I veshur si një punonjës i pastrimit dhe, në një moment, duke u shfaqur në kabinën e një kamion plehrash, Donald Trump kërkoi të bindë votuesit në shtetin e luhatshëm të Wisconsin të mërkurën se demokratët besojnë që ata që votojnë për të janë “plehra”.

Këto inskenime erdhën si përgjigje ndaj një lapsusi të bërë nga Joe Biden një natë më parë, për të cilin presidenti tha se kishte për qëllim të kritikonte një komedian për komentet e tij raciste gjatë një mitingu madhështor që Trump mbajti në Madison Square Garden të New Yorkut gjatë fundjavës.

Por Trump dhe aleatët e tij kanë përvetësuar fjalët e Biden për të argumentuar se kandidatja demokrate Kamala Harris është e pandershme në premtimin e saj për të qenë presidente për të gjithë amerikanët, përfshirë ata që nuk votojnë për të.

Gjatë një vizite në qytetin Green Bay, që ndodhet në një rajon republikan të një shteti të lëkundur ku sondazhet tregojnë se çdo kandidat mund të fitojë, Trump e theksoi pikën duke lënë mënjanë xhaketën e zakonshme dhe duke veshur një jelek reflektues portokalli për një fjalim në një arenë të mbushur me mbështetësit e tij me kapele të kuqe.

Kandidatja demokrate për presidente dhe nënpresidentja e SHBA, Kamala Harris, bën fushatë në Madison, Wisconsin.

“Fillimisht, dua të them se 250 milionë amerikanë nuk janë plehra”, tha Trump në fillim të fjalimit të tij prej pothuajse 90 minutash. Ai nuk specifikoi se si arriti në shifrën e 250 milionëve, por duket të jetë popullsia e përafërt e Shteteve të Bashkuara, duke përjashtuar ata që votuan për Biden në 2020.

“Këtë javë, Kamala i ka krahasuar kundërshtarët e saj politikë me vrasësit masivë më të këqij në histori, dhe tani, gjatë një telefonate për fushatën e saj mbrëmë, Joe Biden-i korruptuar më në fund tha atë që ai dhe Kamala me të vërtetë mendojnë për mbështetësit tanë. Ai i quajti ata plehra. Jo, kjo s’ka mundësi!”.

Lapsusi i Biden, një nga shumë që ai ka bërë në pothuajse katër vjet në detyrë, rrezikon të komplikojë fushatën e Harris, pas përpjekjes së saj për të fituar mbështetjen e votuesve latinë, që u përforcua nga komenti i komedianit Tony Hinchcliffe në mitingun e Madison Square Garden të dielën se territori i SHBA-ve, Puerto Rico, është “një ishull lundrues plehrash në mes të oqeanit”.

Yjet porto-rikanë Bad Bunny dhe Ricky Martin kanë shpallur mbështetjen e tyre për Harris, dhe të mërkurën, këngëtari i reggaeton-it, Nicky Jam, i cili gjithashtu ka lidhje me ishullin, përmendi komentet në vendimin e tij për të tërhequr mbështetjen për Trump.

Pavarësisht kësaj, Biden duket se i dha GOP-it një linjë të re sulmi, kur ai tha në një telefonatë me një organizatë votuesish latinë të martën mbrëma.

“Plehrat e vetme që shoh aty është demonizimi i tij – retorika e tij e urryer ndaj latinëve është e pamëshirshme dhe jo-amerikane”. Më vonë, presidenti sqaroi se synonte të kritikonte “retorikën e urrejtjes” ndaj latinëve që u pa në Madison Square Garden, por fushata e Trump-it këmbënguli se Biden po ofendonte njerëzit që kishin votuar për ish-presidentin.

Harris mbrojti veten të mërkurën më herët, duke u thënë gazetarëve: “Unë nuk pajtohem aspak me çdo kritikë ndaj njerëzve bazuar në atë për kë kanë votuar”. Nënpresidentja ka theksuar kohët e fundit arritjen tek republikanët e moderuar dhe të pavarurit, dhe bëri fushatë me republikanë që janë larguar nga Trump.

Por në mitingun e Green Bay, paraqitja e dytë e Trump-it për ditën pas një ndalese në Karolinën e Veriut, fjalët e Biden ishin tema kryesore për të gjithë.