Policia turke ka arrestuar të martën shtatë pjesëtarë të dyshuar të grupit ekstremist, Shteti Islamik (ISIS).

Arrestimet kanë ndodhur në Ankara. Ata janë duke u akuzuar për përgatitjen e sulmeve gjatë festave kombëtare në Turqi, njoftojnë mediet dhe zyrtarët turk.

Sipas informacioneve, ata po planifikonin sulme në Ditën e Republikës që shënohet të enjten dhe ceremonitë që mbahen më 10 nëntor në të cilat përkujtohet themeluesi i shtetit modern turk, Mustafa Kemal Ataturk, njofton transmetuesi “NTV”.

Forcat speciale të policisë kanë bastisur shtëpitë e të dyshuarve, dy prej të cilëve besohej se kishin luajtur një “rol aktiv” në luftimet në Siri.

Zyra e kryeprokurorit publik të Ankarasë ka thënë në një deklaratë se shtatë urdhra arrestimi për anëtarët e ISIS-it janë lëshuar të martën dhe ata janë arrestuar të gjithë si pjesë e dy hetimeve të ndara, por nuk ka dhënë më shumë detaje.

Kombësitë e tyre nuk janë bërë të ditura.

Turqia është goditur nga një seri sulmesh terroriste më 2015 dhe 2016 për të cilat ishte fajësuar ISIS-i dhe militantët kurdë.

Sulmi i fundit ka ndodhur në janar të vitit 2017 kur një person i armatosur kishte vrarë 39 njerëz në një klub elitar nate në Stamboll gjatë festimeve të Vitit të Ri, raporton “AFP”.