![](https://www.epokaere.com/wp-content/uploads/2022/09/Mevlut-Cavusoglu.jpg)
Turqia bën thirrje për heqje të sanksioneve ndaj Iranit dhe Venezuelës
Turqia ka thënë të premten se heqja e sanksioneve të Perëndimit ndaj shteteve si Irani dhe Venezuela, do të lehtësonte krizën globale të energjisë, të nxitur nga lufta e Rusisë në Ukrainë.
Shtetet e Bashkuara kanë sanksionuar sektorin e naftës në Venezuelë prej vitit 2019, derisa Iranin pas tërheqjes së Uashingtonit nga marrëveshja bërthamore e vitit 2015 që Teherani ka nënshkruar me fuqitë botërore.
Irani është shteti i dytë në botë për rezerva të gazit natyror – pas Rusisë – mirëpo i mungon infrastruktura për rritje të eksporteve.
Aktualisht Irani realizon eksporte të kufizuara në Irak dhe Turqi.
“Gjithë botës i duhet nafta dhe gazi natyror i Venezuelës. Në anën tjetër, ekzistojnë embargo në naftën iraniane”.
“Hiqni këto sanksione… nëse dëshironi që të bien çmimet, hiqni embargot nga shtetet që do të ofrojnë produktet e tyre në treg . Ju nuk mund të zgjidhni problemin duke e kërcënuar një shtet”, ka thënë ministri i Jashtëm turk, Mevlut Cavusoglu.
Vendimi i Moskës për të ndaluar furnizimet me gaz në Evropë – pas sanksioneve që ia ka vënë Perëndimi për luftën e nisur në Ukrainë – ka shkaktuar krizë në kontinent, raporton “Rel”.
Përveç bizneseve, dhe ekonomitë familjare janë paralajmëruar për një dimër të vështirë.
Turqia – vend anëtar i NATO-s – mban marrëdhënie të mira, edhe me Rusinë, edhe me Ukrainën.
Por, ajo nuk i është bashkuar Perëndimit në vënien e sanksioneve ndaj Moskës.
Lufta në Ukrainë ka nisur më 24 shkurt. Presidenti rus, Vladimir Putin, e konsideron luftën si “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.