Gjiganti “Twitter” ka publikuar të hyra rekorde për çerekun e fundit të vitit 2020, duke shënuar atë që shefi ekzekutiv, Jack Dorsey e ka konsideruar “vit të jashtëzakonshëm” për platformën.

Ky rrjet social ka thënë se të hyrat i janë rritur për 28 për qind, apo në 1.29 miliard dollarë, në krahasim me çerekun e fundit të vitit 2019.

Në janar të këtij viti, “Twitter” ka bllokuar ish-presidentin amerikan, Donald Trump nga kjo platformë.

“Twitter” ka marrë këtë vendim pas trazirave në ndërtesën e Kongresit amerikan më 6 janar, si pasojë e të cilave mbetën të vdekur pesë persona.

Analistët kanë thënë se kjo gjë mund të ketë ndikim në këtë çerek në të hyrat e kompanisë.

“Ne jemi platformë që është qartazi shumë më e madhe sesa një temë apo një llogari”, ka thënë Dorsey.

Ai ka thënë edhe se 80 për qind e audiencës së Twitterit është jashtë Shteteve të Bashkuara.

Kompania ka paralajmëruar se shpenzimet totale mund të rriten për të paktën 25 për qind këtë vit, meqë planifikon të rrisë stafin për 20 për qind.

“Twitter” e ka përmbyllur vitin 2020 me më shumë se 5,500 punëtorë./rel/