Zëvendësministri i Infrastrukturës dhe Transportit, Rexhep Kadriu, mori pjesë të enjten në përurimin e tunelit në hyrje të Mitrovicës.

Zëvendësministri Kadriu ka thënë se duke pasur parasysh faktin që për 50 vite asnjëherë nuk është investuar në këtë tunel dhe pas shembjes së kurorës së tunelit vitin e kaluar, rinovimi i tij ka qenë i domosdoshëm për të gjithë ata që e frekuentojnë këtë rrugë.

Ai ka shtuar se edhe vonesa në përmbyllje të punimeve është bërë shkaku i intervenimeve të nevojshme shtesë, sipas standardeve më të larta për evitimin e rreziqeve që kanë ekzistuar paraprakisht në tunel.

Kryetari i Komunës së Mitrovicës, Agim Bahtiri, e ka falënderuar ministrinë për këtë punë të shkëlqyeshme dhe të nevojshme në këtë tunel.

Ky tunel ka gjatësi prej 250 metra, me gjerësi prej 6.5 metra, kurse vlera e investimit në riparimin e tij është afër 380 mijë euro.

Tuneli është punuar sipas parametrave të parapara për këtë kategori tunelesh  dhe ka tërë infrastrukturën e nevojshme.

/Epoka e re/