Shtetet e Bashkuara të Amerikës (ShBA) i kanë vënë sanksione kompanisë shtetërore të naftës në Venezuelë-PDVSA, dhe i kanë bërë thirrje ushtrisë së këtij vendi që të pranojë transferimin paqësor të pushtetit.

Këshilltari për siguri kombëtare, John Bolton, ka thënë se presidenti i Venezuelës, Nicolas Maduro, dhe aleatët e tij “nuk mund të plaçkitin më pasuritë e popullit të Venezuelës”.

Përpjekjet e opozitës për të rrëzuar Maduron janë rritur ditëve të fundit.

Shtetet e Bashkuara dhe mbi 20 vende të tjera e kanë njohur udhëheqësin e opozitës, Juan Guaido, si president të përkohshëm.

Sekretari amerikan i Thesarit, Steven Mnuchin, ka thënë se blerjet e naftës së Venezuelës nga Qeveria e Maduoros do të pezullohen, por ka shtruar se kompania mund t’i shmangë sanksionet nëse e njeh Guaidon.

Venezuela varet shumë nga ShBA-ja për të ardhurat e saj nga nafta.

Ajo i dërgon 41 për qind të eksporteve të naftës në ShBA.

Ekonomia në Venezuelë është dobësuar nën presidentin Maduro.

Inflacioni i lartë, ndërprerjet e energjisë elektrike dhe mungesa e gjërave bazë kanë bërë që miliona njerëz të ikin nga ky vend.

Maduro është rizgjedhur për një mandat të dytë vitin e kaluar, por zgjedhjet kanë qenë të diskutueshme, pasi shumë kandidatë të opozitës janë ndaluar të garojnë ose janë burgosur.