Panairi i Universiteteve Franceze ka nisur duke u ofruar studentëve një mundësi për t’u njohur me përfaqësues nga universitetet franceze që kanë ardhur në Prishtinë për të ekspozuar ofertat e tyre akademike.

Ky panair nuk është vetëm për studentët që tashmë kanë vendosur të studiojnë në Evropë, por është gjithashtu një burim i vlefshëm për ata që janë ende duke eksploruar opsionet e tyre.

Rektori i UP-së, Qerim Qerimi, ka vlerësuar perspektivat e paçmuara që po u ofrohen studentëve gjatë panairit.

Rektori nënvizoi se ky panair shënon të gjashtin vit radhazi, një dëshmi e lidhjeve të forta të bashkëpunimit mes institucioneve.

Rektori Qerimi u bëri thirrje studentëve që të shfrytëzojnë mundësitë e ofruara, duke e njohur edukimin si gur themel të progresit.

Ambasadori i Francës në Kosovë, Olivier Guerot, ka theksuar disponueshmërinë e kurrikulave në gjuhën angleze në universitetet franceze duke nënvizuar dhe përvojën pasuruese që ofron studimi në Francë, ku një numër i konsiderueshëm studentësh nga Kosova tashmë përfitojnë nga kjo mundësi.

Të martën të pranishmit patën mundësinë të dëgjojnë prezantime të ndryshme rreth studimeve në Francë, duke përfshirë dëshmi personale nga ish-përfituesit e bursave franceze.