Universiteti i Kembrixhit ka njoftuar se nuk do të ketë ligjërata nëpër ambiente të tij në vitin e ardhshëm akademik për shkak të pandemisë me koronavirusin e ri.

Megjithatë, mësimet do të jenë të qasshme online për studentët, derisa “mësimet nëpër klasa do të mundësohen vetëm për grupe të vogla studentësh”, nëse zbatohen kërkesat për distancim fizik, është thënë në njoftim.

Kampuset universitare janë mbyllur këtë vit, për shkak të shpërthimit të pandemisë me sëmundjen Covid-19, që shkakton ky virus.

Zyrtarë të Universitetit ka thënë se do të rishqyrtojnë këtë vendim nëse ndryshon udhëzimi për distancim fizik.

Në deklaratë është thënë se universiteti është duke u adaptuar vazhdimisht me udhëzimet që vijnë gjatë pandemisë.

Të gjitha mësimet janë duke u zhvilluar online në këtë universitet nga muaji maj, derisa provimet janë duke u kryer në mënyrë virtuale./rel/