Universiteti i Prishtinës ka shpallur konkursin për studimet e doktoratës të vitit akademik 2025/’26.

Me konkurs është paraparë të pranohen 51 studentë të rinj të doktoratës në 7 programe studimore të 5 fakulteteve. Kandidatët mund të aplikojnë për studime doktorate në inxhinieri elektrike dhe kompjuterike, mjekësi, edukim, filologji dhe shkenca matematiko- natyrore.

Për të qenë i vlefshëm aplikimi i tyre në konkurs, këta kandidatë në të dy nivelet e studimeve baçelor e master, duhet ta kenë notën mesatare më të lartë se tetë.

Konkursi do të jetë i hapur dy muaj, nga 2 prilli deri më 2 qershor 2025. Detajet e konkursit dhe dokumentet e nevojshme për aplikim, mund t’i gjeni të shpjeguara këtu.

Universiteti i Prishtinës, më i vjetri, më i madhi dhe më i suksesshmi institucion i arsimit të lartë në Kosovë dhe i rendituri më së larti në platformat prestigjioze ndërkombëtare nga të gjitha universitetet e hapësirave gjeografike ku jetojnë shqiptarët, është i vetmi universitet në vendin tonë i akredituar për studime doktorate.