Pasi uroi ditën e Pavarësisë së Kosovës, duke shprehur shqetësim për “padrejtësinë e madhe” që Hashim Thaçi, ish-Presidenti i vendit, mbetet në paraburgim në pamundësi për të festuar, llogaria në rrjetin social “X” e emisarit të Posaçëm për Misione të Posaçme i ShBA-së, Richard Grenell, u përball me një valë komentesh negative.

Shumë prej tyre – kryesisht serbë – përdorën gjuhë të ashpër dhe ofendime të rënda në përgjigje të postimit të ish-emisarit për Ballkanin.

Në urimin e tij, Grenell tha se po i bëhet padrejtësi “Atit themelues të shtetësisë së Kosovës, Presidenti Hashim Thaçi.”

Ai shtoi se Thaçi “do të duhej të ishte në Prishtinë duke festuar, e jo prapa grilave në Hagë.”

“Uroj të gjithë miqtë e mi në #Kosovë një festë të gëzueshme dhe të sigurt në 17-vjetorin e pavarësisë së tyre.

Megjithatë, ky përvjetor është i errësuar nga një padrejtësi e rëndë. Babai themelues i shtetësisë së Kosovës, Presidenti Hashim Thaçi, duhet ta festonte sot në Prishtinë – jo pas hekurave në Hagë.

Evropianët kanë dështuar të veprojnë kundër kësaj padrejtësie për 5 vitet e fundit. Dhe institucionet shtetërore të Kosovës kanë dështuar të ndërmarrin veprimet e nevojshme ligjore për t’i dhënë fund kësaj padrejtësie – për shkak të politikës.

Kjo burgosje e padrejtë duhet të marrë fund.” – tha Grenell.

I wish all my friends in #Kosovo a joyous and safe celebration on the 17th anniversary of their independence.

However, this milestone is overshadowed by a grave injustice. The founding father of Kosovo’s statehood, President Hashim Thaçi, should be celebrating today in Pristina…

— Richard Grenell (@RichardGrenell) February 17, 2025

Postimi i Grenell nuk u prit mirë nga ndjekësit e tij serbë, të cilët nisën një fushatë komentesh të ashpra, ku disa përdorën gjuhë urrejtjeje dhe fyerje të rënda ndaj diplomatit amerikan.

Në mesazhet e tyre, disa prej tyre kanë shkruar: “Shkoni në ferr me gjithë administratën amerikane”, “Largohu, pe*er”, “Kosova është Serbi”…/Nacionale

Vlen të theksohet se ish-emisari i ShBA-së për Ballkanin Perëndimor nuk e uroi Serbinë për Ditën e Shtetësisë, e cila festohet më 15 shkurt.