Universiteti i Shkencave të Aplikuara në Ferizaj (UShAF), po vazhdon të krijojë mundësi për aftësimin profesional të studentëve.

Rektori i UShAF, Prof. Dr. Agron Bajraktari, ka nënshkruar edhe një marrëveshje bashkëpunimi për këtë qëllim, kësaj radhe me ndërmarrjen për veprimtari hoteliere “Bellevue”, në fshatin Jezerc të Ferizajt.

Rektori Bajraktari falënderoi pronarin e Bellevue, Skender Biba për mundësinë që po ua jep studentëve dhe ndër tjera tha se ky bashkëpunim rrit vlerën e studimit, pasi studentët përveç pjesës teorike, tani do të kenë mundësinë që të kompletohen në profesionin e tyre edhe me profesionalizmin e ofruar nga kjo ndërmarrje.

Po ashtu, ai tha se kjo marrëveshje do të ndikoj edhe në ngritjen e cilësisë së punës së ndërmarrjes.

Ndërsa, Biba u shpreh shumë i kënaqur me nënshkrimin e kësaj marrëveshje dhe falënderoi rektorin për punën që po bënë në zhvillimin e Universitetit dhe krijimin e mundësive të shumta për përgatitje të të rinjve për tregun e punës.

Marrëveshja ka për qëllim realizimin e pjesës praktike të studentëve të universitetit në këtë ndërmarrje.

Po ashtu, iu mundëson studentëve zhvillimin e temave të diplomës, duke krijuar mundësinë që krahas udhëheqjes teorike/shkencore, të kenë edhe udhëheqjen e pjesës praktike të  diplomës, ndërsa ndërmarrja do të përfitojë nga angazhimi i stafit të UShAF në zgjidhjen e problemeve praktike/shkencore.