Ushtarakë nga Forcat e Armatosura të Republikës së Shqipërisë (FARSh) dhe nga Forca e Sigurisë së Kosovës (FSK) janë trajnuar dhe certifikuar në Qendrën Ndërkombëtare të Trajnimit për Kërkim Shpëtimit (QNTKSh) të FSK-së në kurset e kërkim-shpëtimit urban bazik dhe i avancuar.

Qëllimi i këtyre trajnimeve ishte përgatitja e personelit me metodat bazike dhe të avancuara të Kërkim Shpëtimit, përdorimin e pajisjeve për të zhvilluar aftësitë kritike në përgjigjen ndaj katastrofave urbane.

“Në nivelin bazik janë përgatitur ushtarakët me njohuri bazike për operacionet e kërkim-shpëtimit urban, vlerësimi i ndërtesave dhe strukturave, prezantimi i mjeteve dhe teknikave të shpëtimit ndërsa në nivelin e avancuar pjesëmarrësit stërviten në skenarë të ndërlikuar të shembjes së strukturave dhe shpëtimit në hapësira të kufizuara, teknikat e avancuara të shpëtimit, koordinimi taktik midis ekipeve nga njësi të ndryshme”, ka njoftuar FSK-ja.

Ky trajnim është një dëshmi e angazhimit të vazhdueshëm të QNTKSh-së, për të përmirësuar aftësitë rajonale të përgjigjes ndaj katastrofave dhe për të forcuar bashkëpunimin ushtarak në operacionet e kërkim-shpëtimit.