JEVREM BRKOVIQ

Vajzat e mia

Nëse do të kisha vajzë

do ta quaja Helena.

Nëse do t’i kisha dy vajza

do t’i quaja Helena dhe Itana.

Po t’i kisha tri vajza

do t’i quaja Helena, Itana dhe Tavita.

Helenën do ta martoja me një tregtar grek,

sipas mundësisë,

të ishte pasardhës i Homerit.

Itanën do ta dërgoja në Sarajevë

që të bëhej infermiere.

Tavita do ta studionte arkeologjinë

që një ditë, në Dukël,

edhe varrin tim ta hapte.

(Përktheu: Salajdin Salihu. Marrë nga revista “Akademia”, nr. 5)