Zëvendëspresidenti i ShBA-së, JD Vance, ka shprehur besimin se ka një “shans të mirë” për arritjen e një marrëveshjeje tregtare me Mbretërinë e Bashkuar, duke theksuar se pasojat e tronditjes së tregtisë globale të Amerikës vazhdojnë të zbuten.

Në një intervistë për faqen e internetit UnHerd, Vance theksoi se ShBA-ja po punon ngushtë me qeverinë britanike të drejtuar nga Keir Starmer për të arritur një marrëveshje të mundshme. Kjo vjen pas njoftimit të presidentit Donald Trump për tarifa gjithëpërfshirëse ndaj shumicës së vendeve, përfshirë Britaninë e Madhe, Francën dhe partnerë të tjerë tregtarë të mëdhenj. Politika e paprecedentë tregtare e ShBA përfshin një tarifë “bazë” prej 10% për të gjitha importet nga këto shtete.

Vance gjithashtu shprehu admirimin e presidentit Trump për Mbretin Charles dhe theksoi “afinitetin kulturor” që ekziston mes ShBA-së dhe Mbretërisë së Bashkuar, duke theksuar lidhjet historike mes dy vendeve.

Megjithatë, zëvendëspresidenti kishte kritika për Evropën, duke deklaruar se mungesa e shpenzimeve ushtarake kërcënonte t’i linte vendet evropiane, përveç Britanisë, Polonisë dhe Francës, si “vasalë të sigurimit të Shteteve të Bashkuara”. Ai shtoi se kjo ishte një shqetësim i madh për sigurinë e kontinentit.

Në mbrojtje të politikës tregtare të administratës Trump, Vance theksoi se presidenti po kërkonte vetëm drejtësi, por e pranoi se për të pasur sukses, zyrtarët duhet të jenë të gatshëm të dëgjojnë edhe shqetësimet dhe rekomandimet e komunitetit të biznesit.