Komisioneri për Fqinjësi dhe Zgjerim, Oliver Varhelyi, ka thënë se Kosova duhet të punojë që të vazhdojë t’i përmbushë të gjitha kriteret për heqjen e vizave.

Ai gjatë takimit të Komitetit për Punë të Jashtme të Parlamentit Evropian, ka thënë se KE-ja mbetet i përkushtuar për këtë proces.

“Komisioni mbetet i përkushtuar që të mundësojë liberalizimin e vizave për kosovarët dhe mbesim në pozicionin që Kosova t’i përmbushë të gjitha kriteret. Ne vazhdojmë t’i bëjmë thirrje Kosovës që të sigurohet që të gjitha kushtet të vazhdojnë të plotësohen”, ka thënë ai.

Varhelyi e ka lavdëruar heqjen e taksës 100 për qind për produktet e Serbisë dhe Bosnjës e Hercegovinës duke thënë se kjo e riktheu Kosovën dhe Beogradin në dialog.

“Heqja e taksës 100 për qind për produktet e Serbisë dhe Bonjës e Hercegovinës ka qenë një vendim krucial që BE-ja e ka mirëpritur. Kjo e ka mundësuar gjithashtu vazhdimin e dialogut Prishtinë-Beograd të lehtësuar nga BE-ja”.

Në takimin që po mbahet para prezantimit të Raportit të Komisionit Evropian për Kosovën dhe vendet e Ballkanit Perëndimor, Varhelyi ka thënë se Kosova nuk ka arritur që të bëjë progres në reformat në rrugën drejt BE-së.

“Konteksti politik në Kosovë gjatë vitit të fundit ka qenë i paqëndrueshëm dhe nuk ka qenë i favorshëm për të bërë progres në reformat e ndërlidhura me BE-në. Në mënyrë që të kthehet fokusi në këto reforma, në ditët në vijim bashkë me kryeministrin Avdullah Hoti do të lansojmë fazën e dytë të Agjendës së Reformave Evropiane”, është shprehur ai.