DARKO CVIJETIÇ

Aidën e klasës sime, herën e parë pas luftës e takova më 2001
Jetonte në Holandë e martuar me një gjerman
Vajzat i kishte të rritura
Kah fundi i vitit e lajmëruan se vëllanë e saj e kishin identifikuar
në një varrezë masive
Dhe ajo i varrosi disa eshtra të tij
Herën e dytë e takova më 2005
dhe sërish gjetën diçka nga vëllai i saj
E kërkuan sërish më 2008 sepse në një varrezë tjetër masive
gjetën ende nga vëllai i saj
Në vitin 2015 ajo ishte më e heshtur dhe shumë më e plakur
Sërish kishin gjetur diçka dhe sërish gjithçka sillet rrotull
Deri kur kështu, në çdo katër-pesë vjet?
Çfarë të bëj, miku im i klasës, nëse vitin tjetër gjejnë edhe diçka nga vëllai im?
Edhe ashtu varri im është plot.

(Përktheu: Salajdin Salihu)