![](https://www.epokaere.com/wp-content/uploads/2020/05/Policia-3-600x360-1.jpg)
Vazhdon dhuna në Nju-Jork, vetura e policisë godet protestuesit
Policia në Nju-Jork i ka filluar hetimet për një rast pas publikimit të një videoje ku shihet një veturë e policisë duke goditur disa protestues në turmë. Në videon 27-sekondëshe të publikuar në “Twitter” shihet një veturë e policisë teksa sulmohet me shishe nga disa protestues. Mes veturës dhe protestuesve janë disa barrikada, shkruan “CNN”, transmeton Express.
Më pas, vetura e policisë niset papritmas dhe me vrull drejt protestuesve që ishin shumë afër përballë saj dhe duket se i godet disa prej tyre. Në video dëgjohen njerëz duke bërtitur dhe një protestues duke hipur mbi veturë dhe duke e goditur xhamin e përparmë me këmbë.
Ky incident vetëm sa i ka shtuar tensionet mes policisë dhe protestuesve. Shumë protesta që kanë shpërthyer në qytetet kryesore të Shteteve të Bashkuara janë rezultat i zemërimit të njerëzve për vdekjen e afrikano-amerikanit George Floyd në duart e policisë në Minneapolis.
Kryetari i qytetit, Bill de Blasio, tha se incidenti është duke u hetuar, por shtoi se policia ka mundësi të mos ketë pasur rrugëdalje tjetër.