![](https://www.epokaere.com/wp-content/uploads/2020/02/veliu-11.jpg)
Veliu dhe zëvendëspresidenti i PE-së bisedojnë për luftimin e korrupsionit
Ministri i Punëve të Brendshme dhe Administratës Publike, Agim Veliu, ka pritur në takim një delegacion nga Gjermania, në krye me zëvendëspresidentin e Parlamentit Evropian, njëherit eurodeputetin gjerman, Rainer Wieland.
Gjatë takimi është diskutuar lidhur me bashkëpunimin në mes të Kosovës dhe Gjermanisë në fushën e administratës publike, për trajnime dhe shkollime të larta për zyrtarët që kontribuojnë në administratën publike.
Me këtë rast, Veliu ka theksuar se Ministria e Punëve të Brendshme dhe Administratës Publike është e angazhuar që të punojë në drejtim të avancimit të administratës publike, e cila është një ndër kriteret në procesin e liberalizimit të vizave me Bashkimin Evropian.
Po ashtu, Veliu ka veçuar luftën kundër të gjitha formave të krimit dhe korrupsionit dhe bashkëpunimin e mëtutjeshëm në këto fusha.
Ndërsa Wieland, ka shprehur gatishmërinë për bashkëpunim për projekte specifike nga fushat e edukimit në programet e BE-së dhe qeverisë gjermane.
Ai ka ndarë përvoja nga fusha e arsimit, luftimit të korrupsionit, ngritja e kapaciteteve të administratës dhe çështje tjera me rëndësi për shtetin tonë.