Ministri i Punëve të Brendshme, Agim Veliu, i shoqëruar nga zëvendësministri i MPB-së, Milan Radojeviq dhe drejtori i përgjithshëm i Policisë së Kosovës, Rashit Qalaj, ka vizituar të mërkurën komunën e Zubin Potokut, Stacionin Policor në këtë komunë, si dhe pikën kufitare në Bërnjak.

Me këtë rast ministri Veliu u njoftua për së afërmi me punën dhe aktivitetet e këtyre institucioneve, sfidat dhe problemet me të cilat ballafaqohet Komuna e Zubin Potokut, zyrtarët policorë në këtë komunë, si dhe policët dhe zyrtarët tjerë kufitar, në veçanti gjatë kësaj kohe të menaxhimit të pandemisë Covid-19.

Me kryetarin e komunës së Zubin Potokut, Srdjan Vuloviq u bisedua mbi thellimin e bashkëpunimit të kësaj komune me Ministrinë e Punëve të Brendshme dhe institucionet shtetërore në përgjithësi, e në veçanti për nevojën e përforcimit të bashkëpunimit dhe të besimit të qytetarëve të kësaj komune në institucionet tona.

Ministri Veliu u prit edhe nga komandanti i Stacionit Policor, Zvezdan Milivojeviq i cili e falënderoi ministrin për vizitën në komunën e tyre dhe njëkohësisht kërkoi që t’u mundësohet ndërtimi i stacionit të ri policor në këtë komunë.

Ndërkaq, në pikën kufitare të Bërnjakut, ministri Veliu pa nga afër punën që po bëjnë policët kufitarë dhe doganierët në qarkullimin e mallrave dhe njerëzve mes dy shteteve, Kosovës dhe Serbisë, por edhe në zbatimin e rregullave të pandemisë, ashtu si në të gjitha pikat tjera kufitare.

(Q.R / Epoka e re)