Kryetari i Federatës së Futbollit të Kosovës, Agim Ademi ka pritur në takim ish-futbollistët e gjeneratës së artë të KF Prishtina, vëllezërit Fadil e Xhevdet Muriqi dhe Sahit Kelmendin. I pari i FFK-së u shprehu mirëseardhje dhe pushime të këndshme në vendlindje vëllezërve Muriqi dhe i falënderoi ata për vizitën, teksa së bashku evokuan kujtime nga karriera e tyre.

Gjatë këtij takimi kreu i FFK-së i njoftoi mysafirët për zhvillimet dhe projektet e deritanishme, por edhe për progresin e futbollit në nivel të klubeve, si dhe me ecurinë e ekipeve përfaqësuese.

Vëllezërit Muriqi shprehën mirënjohjen e tyre për të arriturat e futbollit kosovar, teksa theksuan se më vëmendje i përcjellin paraqitjet e Përfaqësues së Kosovës, por edhe të klubeve në garat ndërkombëtare.

Në fund, Fadil Muriqi pati një dhuratë nga Australia e largët për presidentin Ademi, derisa ky i fundit në shenjë respekti për kontributin e dhënë për futbollin e Kosovës i nderoi ata me fanellat e Përfaqësueses së Kosovës.