Presidenti Donald Trump i akuzoi vendet e tjera se po gënjejnë për numrin e vdekjeve të njerëzve nga virusi “Korona”, ndërsa Shtetet e Bashkuara janë vendi me bilancin më të madh të jetëve të humbura prej këtij virusi në mbarë botën.

“A i beson dikush vërtet shifrat e disa prej këtyre vendeve?”, pyeti Trumpi në konferencë për shtyp në Kopshtin e Trëndafilave të Shtëpisë së Bardhë. Në mënyrë të veçantë, ai përmendi Kinën. Kjo e fundit raportoi 82 295 raste të sëmundjes dhe 3 342 vdekje, por bilanci i Pekinit është vënë në pikëpyetje dhe ai është akuzuar se i ka mbajtur të fshehta përmasat e vërteta të pandemisë. Shtetet e Bashkuara kanë sot 20 për qind të të gjitha vdekjeve nga Covid 19, pavarësisht se përbëjnë vetëm katër për qind të popullsisë së globit.

Një ditë më parë u kalua dhe pragu i dy milionë infektimeve nëpër botë, ndërsa vdekjet janë 130 000. Ndihmat e para të qeverisë federale kanë nisur të mbërrijnë sakaq në llogaritë bankare të amerikanëve në një kohë kur problemet ekonomike të shkaktuara nga koronavirusi po grumbullohen gjithnjë e më shumë. Me mbylljen e shumë fabrikave, prodhimi industrial amerikan është tkurrur gjatë muajit mars, duke regjistruar rënien më të madhe që prej fundit të Luftës së Dytë Botërore.