Deputeti i pavarur në Kuvendin e Kosovës, Haki Abazi, ka reaguar pas njohjes së targave RKS nga Serbia, duke thënë se këtë vendim e ka bërë për çështje financiare.

Abazi ka theksuar se deklaratat e kryeministrit Albin Kurti se Serbia e ka bërë pranimin e tabelave RKS për të moszbatuar marrëveshjen e Brukselit dhe aneksin është manipulim.

Po ashtu, ai ka thënë se Serbia po realizon procese të kalkuluara historike duke arritur zbrazjen e Luginës dhe vështirësimin e funksionalitetit të Kosovës, ndërsa ne merremi me deklarata kozmetike e postime për trimërinë e Sveçlës.

“Serbia ka pranuar tabelat RKS për të përfituar financiarisht nga lëvizja e qytetarëve të Kosovës pas liberalizimit të vizave. Këtë vendim e ka bërë vetëm disa ditë para përfundimit të vitit. Pritjet e gjata disa orësh në kufijtë me Serbinë janë kolonat e makinave që paguajnë taksë rrugore, furnizohen me derivate, blejnë nëpër markete, paguajnë haraç dhe kërkojnë e paguajnë për shërbimet tjera derisa kalojnë nëpër Serbi. Përfituesi nga lëvizja me makina dhe autobus drejt shteteve evropiane nga liberalizimi i vizave është Serbia”.

“Serbia në çdo vendim ka kalkulimin e përfitimit financiar dhe përfitimit nga xhepi i qytetarëve të Kosovës, përderisa qeveritarët dhe eksponentët e saj për më shumë se dy vite kryefjalë e kanë luftën dhe rrjedhimisht frikësimin e investitorëve dhe turistëve. Kjo mendësi e publicitetit të konfliktit dhe luftës në njërën anë e konfliktit të vazhdueshëm me njësitet elitë të policisë, është mendësi qeverisëse e frikësimit të qytetarëve me qëllim të qeverisjes me manipulim dhe për defokusim nga problemet reale të qytetarëve!

“Deklaratat se Serbia e ka bërë pranimin e tabelave për të mos zbatuar marrëveshjen e Brukselit dhe aneksin është manipulim i Kryeministrit. Vuçiq ka arritur ta mbajë Kosovës në kurth dhe njësoj por edhe me sanksione ndaj Kosovës ka arritur që t’ia vendos lakun në fyt me mbishkrimin e ‘Zajdenicës’ dhe tani po i mbledhë paratë e Kosovarëve në ikje për Perëndim! Serbia po realizon procese të kalkuluara historike duke arritur zbrazjen e Luginës dhe vështirësimin e funksionalitetit të Kosovës, ndërsa ne merremi me deklarata kozmetike e postime për trimërinë e Sveçlës!”, ka shkruar Abazi në “Facebook”.

Kujtojmë se Haki Abazi ka qenë pjesë e Lëvizjes Vetëvendosjes, ku në qeverinë Kurti 1 ka qenë zëvendëskryeministër.