Shqipëria tashmë është anëtare jo e përherëshme e Këshillit të Sigurimit të OKB-së.

Kryeministri Edi Rama ka publikuar pamje nga ceremonia e vendosjes së flamurit shqiptar në OKB, nga Ferit Hoxha, përfaqësues i Përhershëm i Misionit të Shqipërisë pranë Kombeve të Bashkuara.

Shqipëria mori mbi dy të tretat e votave më 11 qershor të 2021-s për një mandat dyvjeçar, pas 65 vitesh anëtarësim.

Këshilli i sigurimit ka 15 anëtarë, ku SHBA, Mbretëria e Bashkuar, Franca, Rusia dhe Kina janë 5 anëtare të përhershme ndërsa 10 vendet e tjera anëtare një prej të cilave tani është dhe Shqipëria kanë mandat dyvjeçar.

Ministrja e Jashtme, Olta Xhaçka ka theksuar se prioritet kryesor i mandatit do të jetë lobimi për Kosovën.

“Kjo është një arritje për të cilën duhet të ndihet krenar çdo shqiptar kudo në botë. Duke filluar nga vëllezërit e motrat tona në Kosovë sepse padyshim që Shqipëria do ta përdorë këtë mundësi për të avancuar çështjen e Kosovës, procesin e njohjeve dhe anëtarësimeve në organizata ndërkombëtare sepse Kosova ka qenë, është e do të jetë një kauzë e shenjtë për Shqipërinë. Do të punojmë për shqiptarët, por do të punojmë edhe për rajonin tonë për të konsoliduar arritjet e dekadave të fundit e për mos ta lënë atë të rrëshqasë drejt destabilizimit e tensioneve”, ka thënë ajo.