Avokati mbrojtës i ish-presidentit Hashim Thaçi, kroati Luka Misetic, në një intervistë për mediet e Kosovës, ka folur edhe për paralajmërimet për veprime të mundshme të administratës amerikane të drejtuar nga Donald Trump ndaj Gjykatës Speciale.

Misetic ka thënë se s’është në pozicion të flasë për atë se çfarë mund të bëjë administrata Trump dhe ka theksuar se detyra e tij është të punojë brenda Gjykatës së Hagës deri në momentin që do t’i kërkohet ta bëjë punën e avokatit.

Ai ka thënë se beson që gjatë procesit është qartësuar dështimi i Prokurorisë për të vërtetuar pretendimet ndaj Hashim Thaçit dhe sipas tij, nëse gjyqtarët e shohin një gjë të tillë siç e sheh mbrojtja, atëherë e gjitha që mund të bëhet është të shpresohet një rezultat pozitiv i procesit.

“Nuk jam në një pozicion të di se çfarë do të bëjë administrata Trump. Detyra ime këtu është që të punoj brenda katër mureve të kësaj gjykate dhe ta kryej punën time deri sa të më thonë që nuk duhet ta bëj më këtë punë. Kështu që brenda katër mureve të kësaj Gjykate, siç thashë ne besojmë se gjatë procesit është qartësuar dështimi i Prokurorisë për të vërtetuar pretendimet kundër z. Thaçi. Pra edhe njëherë, nëse gjyqtarët e shohin këtë rast sikurse ne, gjithë çfarë mund të bëjmë është të shpresojmë për rezultatin pozitiv të cilin po e presim në fund të gjykimit”, ka thënë Misetic.