Të bëhet shef i ndonjë skuadre të Formula 1 në të ardhmen nuk është në planet e pilotit holandez Max Verstappen. Dy herë kampioni i botës, në një intervistë për CNN, para fillimit të testeve dimërore, u shpreh: “Kam ndërmend të bëja gjëra të tjera në jetën time pasi të largohem nga Formula 1. Të drejtoj një skuadër nuk është në projektet e mia”.

I pyetur nëse për të drejtuar një skuadër të Formula 1 duhet t’i besosh përvojës së pilotëve apo dëshirës së të rinjve për të treguar veten, ai është përgjigjur: “Unë do ta kisha të vështirë të zgjidhja në këtë çështje. Madje e kam të vështirë edhe të zgjedh dy pilotë për t’i pasur në skuadër nëse do të isha shef, pasi aktualisht ka shumë pilotë të mirë në pistë”.

“Gjithsesi, do të zgjidhja një pilot me përvojë, me shumë gjasa Fernando Alonson. Më pas do të merrja një pilot të ri dhe në këtë rast do të zgjedh Lando Norris. Për mua kjo dyshe mund të funksiononte nëse do ta isha unë drejtues i një skuadre të Formula 1”, ka deklaruar Verstappen, duke mos përfshirë në skuadrën e tij ideale Lewis Hamilton apo Charles Leclerc.