Triumfi në garën e Meksikës ditën e diele ishte i 51-ti në karrierë për pilotin holandez Max Verstappen, i 16-ti këtë sezon.

Një rekord absolut, pasi askush më parë nuk e kishte realizuar këtë gjë. Një paraqitje e shkëlqyer e pilotit të Red Bullit, që prej dy sezonesh dominon në Formula 1, duke mposhtur të gjithë rivalët.

“Të fitosh 16 gara në një sezon është diçka e jashtëzakonshme. Nuk e kisha menduar kurrë më parë se do të arrija të realizojë këtë gjë. Më dukej diçka e pamundur. Në fakt, i gjithë ky sezon ka qenë i jashtëzakonshëm për ne dhe s’ka përfunduar ende”, ka thënë Verstappen.

“Jam munduar të shfrytëzoj në maksimum çdo mundësi, ashtu sikurse bëra edhe në Meksikë, ku mora kreun që në start. Edhe pse gara u ndërpre nuk e ulëm ritmin, por strategjia jonë ndryshoi, pasi nuk e dinim se çfarë do të ndodhte në pjesën e dytë të garës. Një sport me shumë risqe, por shohim përpara”, ka shtuar Verstappen.