Max Verstappen ka shfryrë gjithë dufin në lidhje me akuzat se ai nuk e meritonte titullin kampion në Formulën 1, pasi në garën e fundit u ndihmua nga komisarët e garës, në dëm të Lewis Hamiltonit.

Piloti holandez, në një intervistë për “The Guardian”, ka përdorur tone të ashpra.

“Të gjithë mbajnë mend vetëm garën e fundit, por titulli nuk fitohet vetëm me një garë. Kam bërë një sezon fantastik, duke dueluar e fituar dhe duke parë në kompleks gjithë sezonin e meritoja titullin. Madje kampionati duhej të ishte mbyllur para garës së fundit në Abu Dhabi”, ka thënë Verstappeni. “Fitorja e titullit nuk duhet të kalojë në hije për shkak të polemikave. Sezoni im dhe i Red Bullit ka qenë mjaft pozitiv. Në mjaft gara kam qenë i pafat dhe në pjesën e dytë të sezonit fituam mjaft gara ku nuk ishim favoritë”, u shpreh Verstappenu, që gjatë vitit 2021 fitoi 10 gara në Formula 1.