Kryetari i Kuvendit të Republikës së Kosovës, Kadri Veseli, ka pritur të në takim ndihmëssekretarin gjeneral të OKB-së për Evropë, Azinë Qendrore dhe ShBA, Miroslav Jenca, me të cilin ka diskutuar për proceset politike në Kosovë, arritjet e shtetit të Kosovës në shumë fusha dhe aspiratat në të ardhmen.

Veseli ka konfirmuar se shteti i Kosovës është i përkushtuar në avancimin e demokracisë së brendshme, zhvillimin ekonomik dhe rrugëtimin euroatlantik.

Ai ka thënë se Kosova me politikën e vet të fqinjësisë së mirë, kontribuon në stabilitet, paqe, dialog dhe bashkëpunim në rajon.

Më tutje, Veseli ka thënë se në takim se nëpërmjet dialogun me Serbinë, Kosova synon arritjen e marrëveshjes obligative ligjore nga e cila Kosova do të njihet si shtet i pavarur dhe sovran nga shteti serb dhe në të ardhmen e afërt të bëhet anëtare me të drejta të plota e OKB-së.

Veseli e ka informuar ndihmëssekretarin gjeneral të OKB-së edhe për nismën e tij në kuadër të ballafaqimit me të kaluarën dhe ndëshkimit të krimeve të luftës të bëra nga Serbia.

Me këtë rast, ai ka kërkuar ndihmën e tij, që OKB-ja të marrë në konsideratë peticionin e vitit 2014 që përmban mbi 115 mijë nënshkrime, përmes të cilit kërkohet drejtësi për gratë e dhunuara gjatë luftës në Kosovë.

Po ashtu, kryeparlamentari Veseli ka theksuar se është e padrejtë mospërfshirja e dhunës seksuale gjatë luftë së Kosovës, në raportet e përvitshme të OKB-së, duke shtuar se pa të vërtetën dhe pa drejtësinë, vështirë se mund të ketë paqe dhe pajtim.

Ndërsa, ndihmëssekretari gjeneral i OKB-së për Evropë, Azinë Qendrore dhe ShBA, Miroslav Jenca, ka folur për qëllimin e vizitës së tij, i cili ishte prezantimi i punës të Kombeve të Bashkuara në vend.

Ndihmëssekretari gjeneral i OKB-së dhe kryeparlamentari Veseli kanë diskutuar edhe për forcimin e bashkëpunimit midis vendeve të rajonit në Ballkanin Perëndimor.

/Epoka e re/