Kryetari i Kuvendit të Republikës së Kosovës, Kadri Veseli, ka pritur sot në takim një delegacion nga Iowa i Shteteve të Bashkuara të Amerikës, të kryesuar nga gjenerali Timothy Orr.

Në takim u diskutua për bashkëpunimin e ngushtë që Kosova dhe shteti i Iowas kanë ndërtuar ndër vite, si dhe për modalitetet e bashkëpunimin në të ardhmen.

Kryeparlamentari Veseli ka falënderuar  Gardën Kombëtare të Iowa-s dhe shtetin e Iowas në përgjithësi, për mbështetjen e madhe dhënë Kosovës në fushën e sigurisë, sidomos në përgatitjen e kuadrove ushtarakë.

Veseli ka thënë se mbështetja ushtarake për Kosovën është e nevojshme, sidomos tani kur ajo po ndërton kapacitetet e saj të plota ushtarake.   

Gjenerali Timothy Orr, ka deklaruar edhe një herë përkrahjen për Kosovën.

“Jam i nderuar te takoj kryeparlamentarin Veseli dhe ta falënderoj për përkrahjen e tij për këtë marrëdhënie të veçantë mes shtetit të Iowa-s dhe Republikës së Kosovës. Angazhimi i tij demonstron përkushtimin e Kosovës për zgjerimin e partneritetit ndërmjet sektorëve kritikë që përfshijnë edukimin, biznesin dhe agrikulturën, në mënyrë që të forcohet bashkëpunimi në mes të Kosovës dhe Shteteve të Bashkuara të Amerikës”, ka theksuar gjenerali Orr.

/Epoka e re/