Kryetari i Kuvendit të Kosovës, Kadri Veseli, i shoqëruar nga ministri i Financave, Bedri Hamza, ka vizituar të martën një prej bizneseve më të mëdha prodhuese, fabrikën e mobileve “Palma” në Gjilan, e cila shumicën e produkteve i eksporton në vendet e Bashkimit Evropian.

Veseli ka thënë se fabrika “Palma” është shembull i suksesit, ndërmarrësisë, i punës dhe shtetit. “Kosova ka patriotë, ka shtet, ka sovranitetin e integritetin e saj. Asaj aktualisht i mungon ndërmarrësia e fuqishme. Por, njerëz si Ekremi janë duke na dhënë shembull se Kosova ka shpirt ndërmarrësie, ka mundësi dhe potencial të jashtëzakonshëm të zhvillimit. Orientimi im është te njerëzit ndërmarrës dhe inovatorë”, ka theksuar kryeparlamentari Veseli.

Ai ka shtuar se ky do të jetë orientimi i institucioneve të Kosovës, i cili, sipas tij, do të thotë mmbrojtje e sovranitetit dhe integritetit, do të thotë fuqizim i Ushtrisë së Kosovës.

“Me njerëz të tillë të fuqishëm ndërmarrës, mund të zhvillohet dhe fuqizohet Kosova, e jo me fjalë. Ajo çfarë na duhet është mbështetja dhe fuqizimi i kompanive si ‘Palma’, ‘Bini’ e të tjera”, është shprehur Veseli.

Kryeparlamentari Veseli ka pohuar se lehtësirat fiskale, të ndërmarra nga Ministria e Financave, do të vazhdojnë edhe më të tutje.

Pronari i fabrikës “Palma”, Ekrem Shahini, duke falënderuar kryetarin Veseli dhe ministrin Hamza për vizitën dhe mbështetjen e tyre, ka theksuar se pakot fiskale kanë pasur ndikim të drejtpërdrejtë në veprimtarinë prodhuese, duke lehtësuar bërjen e të bërit biznes dhe modernizimin e makinerisë së punës.

Ministri i Financave, Bedri Hamza, nga ana e tij, ka thënë se mbështetja ndaj bizneseve do të vazhdojë edhe në të ardhmen, me theks të veçantë ndaj atyre që eksportojnë produktet.

“Kemi qenë të vetëdijshëm dhe jemi të lumtur që të gjitha masat që i kemi ndërmarrë, do të kenë efekt negativ në buxhet në aspektin afatshkurtër, por në aspektin afatgjatë, do të kenë ndikim pozitiv. Dhe kështu ka ndodhur”, ka deklaruar ministri Hamza.

/Epoka e re/