Përfaqësuesit e tri organizatave të dala nga lufta e UÇK-së pas takimit me presidenten Vjosa Osmani, kanë paralajmëruar protestë më 26 korrik për të kundërshtuar Ligjin për pagën minimale.

Ushtruesi i detyrës së OVLUÇK-së, Faton Klinaku, ka thënë se si organizata të dala nga lufta nuk kanë pasur kontakt as me Qeverinë dhe as me Kuvendin.

Ai tha se u erdhi mirë që presidentja e vendit pranoi kërkesën për takim.

“Ne i paraqitem të gjitha shqetësimet tona. Kjo qeveri që dy vjet e gjysmë as protezat veteranëve nuk ua rregullon”, ka thënë Klinaku, duke theksuar se kjo qeveri po goditë UÇK-në në vazhdimësi.

“Veprimet tona nuk ndërlidhen me presidenten, ajo e ka për obligim ta kryejë si duhet punën e saj, sepse paraqet unitetin e popullit dhe nuk duhet të krijojë përçarje. Kundërshtimet tona vazhdojnë. Kemi paralajmëruar më 26 korrik protestën tonë, atë ditë që do të mbahet seanca”, është shprehur Klinaku.