Veteranët e Ushtrisë Çlirimtare të Kosovës nga Brigada 113 do të protestojnë nesër (e hënë)  në Prishtinë.

Siç është bërë me dije, në këtë protestë do të kërkohet pastrimi i listave të veteranëve, si dhe keqpërdorimeve të tjera. Mirëpo, një protestë e tillë nuk është duke u përkrahur nga Organiziata e Veteranëve të Luftës së UÇK-së.

Kryetari i kësaj organizate, Hysni Gucati, ka thënë të enjten për “lajmi.net” se OVL e UÇK-së përkrah kryeprokurorin e Shtetit, Aleksander Lumezi që të qojë deri në fund hetimin rreth listave të veteranëve.

Madje Gucati  ka thënë se njëri ndër organizatorët e kësaj proteste, Faik Zogaj, nuk ka të drejtë ta bëjë një gjë të tillë në emër të Brigadës 113 për shkak se kjo e fundit ka hierarki të veten.

E ndaj kësaj deklarate ka reaguar vetë Faik Zogaj.

Ai në një përgjigje për “lajmi.net” ka thënë se ka shumë arsye për të protestuar, dhe se sipas tij përkrahja duhet të vijë edhe nga OVL e UÇK-së.

Sipas tij edhe ish-komandanti i përgjithshëm i UÇK-së, është duke u mbajtur padrejtësisht në burg.

“Gucati e di që Sylejman Selimi është duke u mbajtur padrejtësisht në burg që nga shtatori. Unë kërkoj nga Gucati që t’i mbështet jo vetëm protestën e tre shtatorit, por edhe të gjitha protestat që organizojnë veteranët nëse e ndjen e vetën kryetar të OVL-së. Përndryshe ne do të reagojmë ndaj të gjithëve që kërcënojnë të drejtat e veteranëve”, ka thënë Zogaj.

Protesta është paralajmëruar për nesër me fillim prej orës 11:00.

Kujtojmë se çështja e numrit të veteranëve të UÇK-së është riaktualizuar me dorëheqjen e prokurorit i cili po hetonte këto lista, Elez Blakaj. Ky i fundit përmes një letre publike kishte akuzuar kryeprokurin Lumezi për ndërhyrje në hetime.