Më 11 qershor të vitit 2017, ditën kur u mbajtën zgjedhjet e parakohshme parlamentare, Lëvizja Vetëvendosje pati shënuar rezultatin më të mirë të saj në zgjedhje dhe njëherësh, kishte fituar si parti politike, pa llogaritur koalicionet, më së shumti ulëse në Kuvend.

Meqë nuk kishte krijuar koalicion parazgjedhor, Vetëvendosje u ‘detyrua’ të kënaqej vetëm me vendin e opozitës në Kuvend. Ky subjekt politik, mori 32 ulëse në Kuvend, një post të nënkryetarit të Kuvendit dhe udhëheqë me disa komisione parlamentare.

Por, pas afër 6 muajve, ky subjekt politik kishte treguar shenjat e para të përplasjeve të brendshme. Thyerjet e para, ishin vërejtur mes deputetëve Aida Dërguti, Dardan Molliqaj në njërën anë dhe ish-kryetarit të Vetëvendosjes Albin Kurti në anën tjetër.

Përplasjet pasuan publikimin e bisedave private të disa deputetëve të Vetëvendosjes, ku kishte edhe shprehje fyese në drejtuar Albin Kurtit.
Të martën, kryetari i Lëvizjes Vetëvendosje, Visar Ymeri, dha dorëheqje nga të gjitha funksionet në këtë parti politike. Ai ka përmendur përçarjet e vitit të fundit në këtë lëvizje dhe “pamundësinë për të ndikuar në ndaljen e tyre”.

“Kohëve të fundit kam parë një intensitet të shtuar të shpërfilljes së plotë të pozitës sime si kryetar dhe të organeve drejtuese të Lëvizjes sa herë që këto kanë marrë vendime, që nuk kanë qenë në përputhje me vullnetin e një pjese të aktivistëve. Në këto rrethana është e pamundshme të drejtosh”, ka thënë Ymeri.
Në dhjetor të vitit të kaluar, Lëvizja Vetëvendosje shpalli zgjedhjet e brendshme për kryetar të ardhshëm të kësaj lëvizjeje, pas përplasjeve që shpërthyen brenda saj, e cila po përballet me krizën më të rëndë që nga formimi i saj.

Hydajet Hyseni, anëtar i Kryesisë dhe drejtues si Këshillit të Përgjithshme të Lëvizjes Vetëvendosje ka thënë për Radion Evropa e Lirë se për dorëheqjen e Ymerit nuk është diskutuar paraprakisht brenda asnjë organi të Lëvizjes, dhe se siç ka thënë ai, nuk ishin në dijeni më herët për vendimin.

“Çështja e dorëheqjes së kryetarit të Lëvizjes Vetëvendosje është e papërfunduar e pafinalizuar. Është deklaruar publikisht dorëheqja, por ky vendim nuk është shqyrtuar në organet udhëheqëse të Lëvizjes Vetëvendosje. Dhe për më tepër, kjo ka ardhur në një moment shumë të pazakonshëm në kohën kur në Lëvizjen Vetëvendosje, në përputhje me statutin e saj dhe afatet e paracaktuar me status, janë shpallur zgjedhjet për kryetar të VV-së”, ka thënë Hyseni.

Ai ka deklaruar se sipas traditës dhe një praktike të përgjithshme, postin e kryetarit do ta ushtrojë, po i njëjti person deri në zgjedhjen e kryetari të ri, por të gjitha gjërat mbetet të shihen në ditët në vazhdim.
Hyseni ka nënvizuar se në Lëvizjen Vetëvendosje ekziston veçoria që zgjedhja e kryetarit të bëhet duke u bazuat në demokraci.

“Dhe tani është faza e finalizimit të kandidaturave. Dihet se është një kandidaturë, mund të ketë kandidatura të tjera dhe në afatin më të shkurtër sipas statusit do të bëhen zgjedhjet e rregullta një anëtar një votë, dhe në këtë bazë edhe do të zgjidhet kryetari i ri i Lëvizjes Vetëvendosje”, ka thënë Hyseni.
Kandidati kryesor për kryetar të ardhshëm të Vetëvendosjes, sipas njohësve të rrethanave politike, është ish-kryetari i parë i saj, Albin Kurti.

Analisti politik, Imer Mushkolaj, mendon se në Vetëvendosje ka mosmarrëveshje të mëdha mes grupeve të caktuara të cilat janë formuar së fundmi.
“Dorëheqja e Ymerit nga posti i kryetarit, definitivisht e ka vërtetuar se Lëvizja Vetëvendosje ka ndarje, ka çarje të mëdha përpara. Unë kam pritur që Ymeri do të japë dorëheqje. Gjithë ato që kanë ndodhur në Vetëvendosje, kanë çuar drejt këtij veprimi, dhe mendoj se ka bërë mirë që është tërhequr, për shkak se ai ka qenë veç formalisht në krye të partisë, ndërkohë që ne dimë se çfarë sulmesh dhe çfarë akuzash ka përjetuar nga përkrahësit e Kurtit. Është më mirë që është tërhequr, pasi nuk ia ka dalë që t’i pajtojë palët rivale brenda lëvizjes”, thënë Mushkolaj.

Lëvizja Vetëvendosje, fillimisht i ka nisur të veprojë si një lëvizje, duke organizuar tubime e protesta nëpër qytete të ndryshme të Kosovës. Lëvizja Vetëvendosje u themelua në vitin 2004 dhe sipas statutit, ‘angazhohet për ndryshime rrënjësore shoqërore dhe politike, duke u mbështetur në parimin e barazisë, të demokracisë, të lirisë politike dhe të drejtësisë sociale të çdo qytetari’.(rel)