Një shpërthim i fuqishëm ka tronditur Moskën mëngjesin e së hënës, duke marrë jetën e gjeneralit rus Igor Kirillov dhe ndihmësit të tij.

Gjenerali Kirillov, komandant i njësive të mbrojtjes bërthamore, biologjike dhe kimike të Rusisë, u vra në juglindje të kryeqytetit, afër katër milje larg Kremlinit.

Shërbimi Sekret i Ukrainës (SBU) ka marrë përgjegjësinë për sulmin. Sipas mediave ndërkombëtare, pajisja shpërthyese ishte fshehur në një skuter, i cili ishte parkuar afër hyrjes së pallatit nga ku dilte Kirillov.

Dyshohet se sasia e lëndës shpërthyese të përdorur ishte rreth 300 gramë eksploziv. Shpërthimi ka qenë aq i fuqishëm sa ka shkaktuar dëme edhe në disa automjete të parkuara aty pranë.

Ky sulm vjen pas një hetimi të hapur nga Ukraina ndaj Kirillovit për përdorimin e armëve kimike gjatë luftës në Ukrainë. Gjenerali ishte gjithashtu sanksionuar nga Britania e Madhe për përfshirjen e tij në përdorimin e armëve kimike.

Analistët paralajmërojnë se ky sulm mund të rrisë tensionet mes Rusisë dhe Ukrainës. Autoritetet ruse kanë kërkuar hakmarrje dhe ndëshkim për ata që janë përgjegjës për këtë atentat.