Presidenti i Serbisë, Aleksandar Vuçiq, ka thënë se në New York ai po pret që përfaqësuesit evropianë t’i mbajnë atij “ligjërata për mosvendosjen e sanksioneve ndaj Rusisë”.

“Së pari do të më mbajnë një ligjëratë për 7-8 minuta, pastaj të gjithë të tjerët do të më mbajnë leksione. Unë do t’i dëgjoj pastaj do t’u them se unë e udhëheqi Serbinë si president dhe përderisa kjo është kështu, atëherë do të udhëheqim një politikë të tillë. Ne e dimë se si kemi kaluar me sanksione. Pse të marrim pjesë në gjëra të tilla”, tha Vuçiq.

Vuçiq ka thënë se ka dëgjuar presidentin e SHBA-së, Joe Biden dhe ministren e Jashtme të Gjermanisë, Annalena Baerbock, në fjalimin në Asamblenë e OKB-së.

“Bideni në fjalimin e tij përmendi integritetin territorial, sovranitetin dhe vetëm te e treta të drejtat e njeriut si vlera më të larta të njerëzimit. Disa herë iu referua Kartës së OKB-së dhe akteve të OKB-së”, tha Vuçiq, i cili shtoi se në fjalimin e tij do të përmend bombardimet e NATO-s ndaj ish-Jugosllavisë në vitin 1999.

“Edhe tash nuk i njohin rregulloret e OKB-së, përfshirë edhe rezolutën 1244. Ne që jemi të vegjël, më mirë ta kuptojmë me kohë sa të vegjël jemi dhe se të mëdhenjve u lejohet çdo gjë. Ende nuk e kam kuptuar sa të vegjël jemi, ndoshta me këto predikime do të më bindin, por nuk jam i sigurt. Të gjithë të mos e humbin rastin të më japin një mësim për moralin e çdo gjë – si dhe në çfarë mënyre të vendosin sanksione” , tha Vuçiq.

Ai ka thënë se nuk “e njohin Kosovën e pavarur”.

Vuçiq ka thënë se në New York ka pasur takime gati me gjithë liderët evropianë. Ka thënë se do të hanë darkë me presidentët e Ballkanit Perëndimor. Po ashtu ka treguar se është takuar me presidentin e Këshillit Evropiam, Charles Michel, si dhe me presidentin e Turqisë, Recep Tayyip Erdogan.

“Kam biseduar me presidentin turk për çështjet rajonale për vizitën e tij në Serbi. Do të kem një takim edhe me Miroslav Lajçakun dhe me të gjithë ata që duhet të bisedojë për situatën në Kosovë e M.”- tha Vuçiq.