Arben Vitia, kandidat për kryetar të Prishtinës nga Lëvizja Vetëvendosje në një intervistë në “Përballje” në Telegrafi, ka folur për kandidaturën e tij, projektet dhe synimet që ai ka nëse zgjidhet si kryetar i kryeqytetit në garën e balotazhit që do të mbahet me 14 nëntor 2021.

Ai në këtë intervistë ka folur për zgjerimin e sistemit të ngrohjes qendrore në lagje tjera të Prishtinës.

Vitia thotë se edhe problemi i shtrirjes së ngrohjes qendrore është i trashëguar me vite.

“Është një problem që riciklohet prej kohësh. Njeriu kur do të gjejë mënyra për të punuar i gjen 100 zgjidhje. Është një lojë ping-pongu që institucionet ja hedhin fajin njëri-tjetrit. Komuna e Prishtinës duhet të jetë proaktive në lidhje me të gjitha institucionet tjera dhe nivelin qendror. Nuk duhet të ketë arsyetime me faktin se na bllokoi filan ministri apo ky agjencion. Nuk duhet të kemi luksin e këtyre arsyetimeve”.

Kandidati i LVV-së për Prishtinën thotë se shtrirja e Termokosit duhet të ndodh për shumë arsye.

“E para, qytetarët e disa lagjeve që kanë qenë të lëna jashtë dore për disa vite, si Tophanja për shembull, duhet të kenë komoditetin të kenë qasje në ngrohje qëndrore. Do të vazhdojë shtrimi i ngrohjes deri te Banesat e Bardha në Breg të Diellit. Por shtrirja duhet të bëhet e domosdoshme në mënyrë që qytetarët të mos ngrohen me gjëra të dëmshme për ambientin siç është qymyri. Tjetra se ngrohja qendrore është më e lirë”, deklaroi Vitia./Telegrafi