Ministri i Shëndetësisë, Arben Vitia, ka njoftuar se ka nënshkruar përditësimin e ri të listës së produkteve mjekësore, ku janë futur edhe produktet e nevojshme për procedurën e feritilizimit in-vitro.

Ai ka bërë me dije se së shpejti kjo procedurë do të mund të realizohet në institucionet publike shëndetësore.

Sipas Vitisë, për këto produkte qytetarët kanë shpenzuar nga 1000-1500 euro në sektorin privat, derisa ka thënë se së shpejti do të sigurohen falas për qytetarët nga ana e shtetit.

“Një falënderim i veçantë për klinikën e Gjinekologjisë, Shërbimin Spitalor dhe Klinik Universitar të Kosovës, barnatores qendrore të Qendrës Klinike Universitare të Kosovës, Komitetit Kyç për angazhimin profesional që këto produkte të futen në Listën e Produkteve Mjekësore. Futja e këtyre produkteve në Listën e Produkteve Mjekësore është parakusht për të ofruar shërbimin e fertilizimit in-vitro për të cilin qytetarët tanë deri më tani kanë shpenzuar me mijëra euro”, ka shkruar Vitia në “Facebook”.