Vitin e shkuar në Klinikën e Onkologjisë të Qendrës Klinike Universitare të Kosovës, u trajtuan 1 mijë e 626 pacientë si raste të reja me sëmundje malinje.

“Prej tyre, 400 raste ishin të identifikuara me kancer në gji, 214 raste me kancer në mushkëri, 391 raste me kancer në traktin gastrointestinal, 419 raste me kancer në sistemin urgjenital dhe gjinekologjik, si dhe 205 raste me kancer në regjionin kokë-qafë”, ka njoftuar Shërbimi Spitalor Klinik dhe Universitar i Kosovës.

Sipas SHSKUK-së, gjatë vitit 2021, gjithashtu, në Klinikën e Onkologjisë ishin të shtrirë 356 pacientë për trajtim.

“Nga janari deri në dhjetor në këtë klinikë janë ofruar mbi 300 mijë shërbime të ndryshme onkologjike, mes tyre 105 seanca të brahiterapisë, mbi 11 mijë seanca të rrezatimit, më shumë se 29 mijë terapi me citostatikë dhe më tepër se 1 mijë pacientë janë trajtuar me radioterapi”, ka njoftuar SHSKUK-së.