Kompaninë Rajonale të Ujësjellësit ”Prishtina” e vizituan një delegacion i lartë i Bankës Gjermane për Zhvillim (KFW) për Ballkanin dhe Turqinë.

Delegacioni i lartë gjerman përbëhej nga: Georg Gruener,  Uwe Arras dhe  Premtim Islami, koordinator i zyrës së KFW-së në Prishtinë.

Ata u mirëpritën nga kryeshefi ekzekutiv, Sokol Xhafa  dhe zyrtarët e lartë të ndërmarrjes.

Delegacioni qëndroi pesë ditë në Kosovë me mision vlerësues për investime në projekte konkrete zhvillimore për ujëra të ndotura urbane,  mundësinë e financimit dhe ruajtjen e mjedisit, ngritje të kapaciteteve humane dhe teknologjike, zvogëlimin e humbjeve të ujit, etj.

Gjatë vizitës pesë ditore, ata realizuan vizita të shumta në terren në tërë zonën e shërbimit, duke filluar nga objektet administrative, Impiantet e Trajtimit të Ujit e deri te stacionet, rezervuarët  dhe nënstacionet e pompimit.

Vlen të theksohet se,  Banka Gjermane për Zhvillim (KFW) është financuesi dhe mbështetësi kryesor i KRU ”Prishtina” me investime në infrastrukturën e rrjetit të ujësjellësit dhe kanalizimit.