Bashkimi Evropian (BE) duhet të konsiderojë përdorimin e fitimeve nga asetet e ngrira ruse për të blerë furnizime ushtarake për Ukrainën, ka thënë të mërkurën presidentja e Komisionit Evropian Ursula von der Leyen.

“Është koha për të filluar një bisedë rreth përdorimit të fitimeve të papritura të aseteve të ngrira ruse për të blerë bashkërisht pajisje ushtarake për Ukrainën”, i ka thënë ajo Parlamentit Evropian në një fjalim duke i kërkuar BE-së të bëjë më shumë në politikën e mbrojtjes.

“Nuk mund të ketë simbol më të fortë dhe përdorim më të madh për ato para sesa ta bëjmë Ukrainën dhe të gjithë Evropën një vend më të sigurt për të jetuar”, ka thënë ajo, raporton “Reuters”.

Von der Leyen ka thënë se kërcënimi i luftës për BE-në “mund të mos jetë i afërt, por nuk është i pamundur”.

“Rreziqet e luftës nuk duhet të mbingarkohen, por ato duhet të përgatiten dhe kjo fillon me nevojën urgjente për të rindërtuar, rimbushur, modernizuar forcat e armatosura të shteteve anëtare”, ka thënë ajo.

Në fjalimin e saj, von der Leyen, ka parashikuar një strategji të re evropiane të mbrojtjes industriale që komisioni i saj do të prezantojë në javët në vijim, duke thënë se një nga qëllimet e saj kryesore do të ishte t’i jepte përparësi prokurimeve të përbashkëta.