Të martën ka vazhduar seanca gjyqësore ndaj Dardan Krivaqës dhe Arber Sejdiut që akuzohen për dhunimin dhe vrasjen e Marigona Osmanit.

Ky shqyrtim gjyqësor është destinuar për fjalën përfundimtare.

I pari ka folur prokurori i rastit, Valdet Avdiu, i cili ka bërë një përmbledhje nga seancat e kaluara, dëshmitarët dhe provat.

Pas tij fjalën përfundimtare e ka pasur avokati i familjes Osmani, Gazmend Rexhepi, i cili ka thënë se të akuzuarit Dardan Krivaqa e Arbër Sejdiu të dënohen me burgim të përjetshëm.

Rexhepi ka thënë se deklaratat e Sejdiut nuk përputhen me provat e gjetura në vendin e ngjarjes ku u vra dhe u dhunua Marigona Osmani.

Avokati ka theksuar se në video-incizimet e siguruara pamjet janë të tmerrshme.

“E përkrahu fjalën përfundimtare të prokurorit, dhe mendoj se ky rast është sqaruar mjaftueshëm. Në kuptimin e provave, dëshmitarëve dhe raporteve të mjekësisë ligjore. Në fjalën hyrëse, Krivaqa ka deklaruar se nuk është i pafajshëm, por jo bash krejt qysh po thotë prokurori. E pastaj me administrimin e provave e kemi pa se jo qysh po thotë prokurori po edhe më keq edhe më vrazhdë, edhe ma e rëndë se që po thotë prokurori. Ne video-incizim ka dalë shumë më tmerr. Nuk përputhen deklaratat e Sejdiut me provat e gjetura. Ai thoshte kemi pirë kokainë. Aty është gjetur (tavadoll). Tu i pa lëndimet e viktimës sipas raporteve, aty ka qenë vrasje mizore. Besoj se janë plotësuar kushtet që të akuzuarit të shpallën fajtorë dhe të dënohen siç e parasheh ligji me dënim kapital, të përjetshëm”, ka thënë ai.