Në majin e vitit 1991, familja Krasniqi nga Kodra e Trimave në Prishtinë, po e priste me padurim kthimin e birit të tyre, Fatmirit, nga shërbimi i obligueshëm ushtarak në ish-Jugosllavi. Por ky i fundit, familjes iu kthye në arkivol. Shteti serb tha se Fatmiri pësoi aksident, ndërsa familja pa shenja të plumbave në trupin e tij.

Në fund të vitit 1990, një dorë e panjohur iu trokiti në derë.

E kësaj thirrje iu përgjigjen anëtarët e familjes Krasniqi nga “Kodra e Trimave” në Prishtinë.

I biri i tyre, Fatmiri, i kishte mbushur plot 18 vjet.

Për këtë, nga shtabi i përgjithshëm i Armatës Popullore Jugosllave, i erdhi edhe thirrja për ta kryer shërbimin e obligueshëm ushtarak.

“Kam qenë vetëm në klasën e 7 kur ai ka shkuar ushtar. Ai ka qenë mbajtës i familjes. Fatmiri ka punuar me tregti, por i erdhi ftesa dhe iu dashtë me ndërpre punën dhe me shku në ushtri. Fundi i vitit 1990”, tregon Gëzimi Krasniqi, vëllai i Fatmirit.

19 vjeçarit, në fillim të majit, nga armata jugosllave, iu dha leja të kthehej për vikend në shtëpi.

Gëzimi, vëllai i Fatmirit, e mban në mend çdo detaj të asaj vizite.

“E ndjera nëna, bashkë me babën, e ka lutë i kanë thënë nëse ke diçka, ik prej ushtrisë si çdo shqiptar tjetër, por ai ka thënë jo, nuk kam diçka”, shprehet Gëzimi
Në fund të majit të vitit 1991, shërbimit ushtarak të Fatmir Krasniqit, po i vinte fundi.

Për këtë, edhe familja në Prishtinë, po e priste me padurim kthimin e tij.

Por, i gjithë ky gëzim, u kthye në pikëllim.

Kjo pasi zyrtarisht morën lajmin, se i riu shqiptar kishe ndërruar jetë, vetëm pak ditë para se ta kryente shërbimin ushtarak.

“Ditët e fundit para se me përfunduar ushtrinë, atë (Fatmirin) e qesin në rojë të parkingut të kerreve, dhe sipas versionit të tyre, janë leshu dy kamiona dhe e kanë zënë Fatmirin në mes”
Disa ditë më pas, trupi i pajetë i Fatmir Krasniqit, u kthye në Prishtinë.

Bashkë më të, erdhi edhe urdhri nga forcat serbe, të mos hapet arkivoli që mbante trupin e tij të pajetë.

Por, kjo kërkesë nuk u përfill nga familjarët.

Këta të fundit e hapën arkivolin, ndërsa u shokuan nga ajo që panë.

“Është vërtetuar se nuk ka qenë ajo që ata kanë thënë, sepse në trupin e tij ka pas shenja të plumbave dhe obduksion më të vrazhdë nuk kam parë askund, është hapur pjesa përpara që më mbuluar shenjen e plumbit”, tregon vëllai i Fatmirit.

Por, pse vriteshin shqiptarët në përfundim të shërbimit ushtarak?

“Vriteshin vetëm pse janë shqiptar, dhe çka është më e keqja, janë vra në përfundim të ushtrisë, kur familja i kanë prit me u kthye në shtëpi. Dhe a e dini çfarë shkruan në dokumentet e vdekjes së tyre? Shkruhej se janë varë, apo kanë bërë vetëvrasje”, thotë Nebih Balaj, aktivist i çështjes kombëtare
Aktivisti i çështjes kombëtare, Nebih Balaj, ka nxjerrë të dhënat e shqiptarëve të vrarë në armatën jugosllave.

Vetëm nga shënimet e tij, numri i të vrarëve shkon në 117.

E kjo kategori, Balaj thotë se u harruan nga shteti i Kosovës.

“Shteti i Kosovës nuk është interesuar, ju jeni të parët që po vini prej televizioneve, se kërkush nuk është interesuar për këtë kategori dhe këta martirë që kanë ra për shtetin e Kosovës”, shprehet Balaj.

Ndryshe, në varrimin e Fatmir Krasniqit morën pjesë afër 250 mijë persona.

Ndërsa me insistimin e familjes, së fundmi kjo rrugë në Vranjevc, mori edhe emrin e tij.