Deputeti i PDK-së, Abelard Tahiri, ka shkruar për vrasjen e policit në Kaçanik.

Ai ka thënë se pesë vrasje për vetëm dhjetë ditë ndodhën në Kosovë.

“Kjo nuk është vetëm statistikë tragjike, por dëshmi e një kolapsi të thellë të sigurisë publike në Kosovë. Jetët po merren me një lehtësi të frikshme, ndërsa institucionet heshtin. Shteti po dështon në funksionin më elementar të tij – mbrojtjen e qytetarit. Qeveria mban përgjegjësinë direkte për këtë gjendje alarmante. Dështimi për të ndërtuar politika të qëndrueshme të sigurisë, mungesa e kontrollit institucional, dhe toleranca ndaj krimit po i japin Kosovës një realitet ku frika e ka zëvendësuar sigurinë”, ka shkruar ai në “Facebook”.

Ai ka thënë se nuk mund të kemi as paqe, as drejtësi, as zhvillim, kur qytetari jeton në pasiguri.

“Kjo situatë është rezultat i një qeverisjeje të dobët, që nuk po merr përgjegjësi as për jetët që po humbin, as për degradimin e rendit dhe ligjit në vend. Jetët e humbura nuk janë vetëm numra – janë pasoja të drejtpërdrejta të një pushteti që ka harruar qytetarin”, ka shkruar Tahiri.