Kryeministri i Serbisë, Millosh Vuçeviq, ka thënë të hënën se me vendimin për heqjen e ndalimit për hyrjen e produkteve nga Serbia në pikën kufitare të Merdarë, Kosova, sipas tij, e ka zbutur “tensionin që ekzistonte prej kohësh”.

Ai ka thënë se serbët në Kosovë mund të marrin furnizim të rregullt me ​​ushqime dhe ilaçe.

Vuçeviqi ka thënë se do të dëshironte që vendimi të mos ishte vetëm për Merdarë.

“Është një përpjekje e mirë e palës gjermane, e cila theksoi fazën e re të marrëveshjes së CEFTA-s. Ne jemi gjithmonë të gatshëm për marrëveshje, nuk mendojmë se kompromisi është gjë e keqe, veçanërisht nëse kjo do të krijojë kushte më të mira për jetën e serbëve në Kosovë”, ka thënë Vuçeviqi, shkruan “Kosovonline”.