Vojislav Sheshel, i dënuar për krime lufte, vazhdon të mbetet një figurë politike në Serbi. Madje, në zgjedhjet lokale të 17 dhjetorit, Shesheli do të jetë në koalicion për qytetin e Beogradit hiç më pak se me partinë e Aleksandar Vuçqiqit, aktualisht president i Serbisë.

Siç raporton Nova, Shesheli, që është kryetar i Partisë Radikale Serbe (SRS), ka arritur koalicion me SNS-në, partia e Vuçiqit, për zgjedhjet lokale në qytetin e Beogradit.

“Kam pasur bisedime me Aleksandar Vuçiqin, Ana Brnabiqin dhe Darko Glishiqin dhe ramë dakord që SRS të hyjë në koalicion me SNS-në në zgjedhjet e Beogradit dhe në zgjedhjet komunale dhe të qytetit në brendësi të Serbisë. Përfaqësuesit tanë do të përfaqësohen në listat e kandidatëve dhe ne do të marrim pjesë pas zgjedhjeve në pushtetin ekzekutiv”, tha Shesheli në TV Happy, raporton Nova.

Ndryshe, i dënuari për krime lufte, pra Shesheli, mbahet mend për retorikë të ashpër ndaj Kosovës dhe shqiptarëve, ndërsa gjatë luftës në Kosovë, ai mbronte idenë për largimin e shqiptarëve nga Kosovës përmes spastrimit etnik.

Shesheli ishte një nga përkrahësit e parezervë të politikës së Sllobodan Millosheviqit, ish-diktator i Serbisë, i njohur gjerësisht si Kasapi i Ballkanit, karshi luftës në Kosovë, ku u kryen krime të luftës dhe krime kundër njerëzimit.