![](https://www.epokaere.com/wp-content/uploads/2018/09/ThaciVucic-800x450-780x439.jpg)
Vuçiqi bën me dije se pas pandemisë Serbia duhet të merret me çështje të vështira – Kosovën
Presidenti i Serbisë, Aleksander Vuçiq, ka thënë se pas tejkalimit të pandemisë me Covid-19 vendi i tij duhet të merret me çështje të vështira. Sipas tij, zgjidhja e problemit me Kosovën është një prej çështjeve më të rëndësishme.
Këto deklarime Vuçiqi i ka bërë derisa ka marrë pjesë në nisjen e punimeve për ndërtimin e hekurudhës Beograd – Budapest.
Kreu i shtetit serb ka paralajmëruar se çështja e Kosovës duhet të zgjidhet sapo të kalojë situata me Covid-19.
Dialogu në mes të Kosovës dhe Serbisë vazhdon të jetë i bllokuar që nga nëntori 2018 si pasojë e taksës 100 %. Ndërkohë, nga BE-ja dhe ShBA-ja në vazhdimësi ka pasur thirrje për rinisje të negociatave.
Rikthimin në tryezën e diskutimeve e kanë vonuar zhvillimet e brendshme politike në Kosovë derisa nuk pritet të ketë negociata para përfundimit të zgjedhjeve në Serbi të cilat do të mbahen në muajin qershor të këtij viti.