Presidenti i Serbisë, Aleksandër Vuçiq, është përfshirë gjithashtu në diskutimin e hipotezave lidhur me helmimin e mbi 1 500 qytetarëve të Deçan.

Ai ka thënë se e kanë analizuar praninë e dy serbëve diku rreth burimit të ujit në Deçan, i cili u dyshua të jetë shkaku i helmimeve.

“Ne kemi një analizë të lëvizjes së automjetit me targa Novi Sadit, ata nuk ishin as 500 metra nga burimi i ujit. Ne po presim të shohim se çfarë do të thonë. Ne po presim, po dëgjojmë”, ka thënë Vuçiqi, duke u përgjigjur pyetjet e gazetarëve, raporton “B92”.

Mbi 1 500 banorë të fshatrave të Deçanit kanë kërkuar ndihmë mjekësore, duke shfaqur simptoma të helmimit.

Uji i pijes ishte dyshimi i parë për helmimin e tyre, por analizat fillestare të Institutit Kombëtar të Shëndetësisë Publike të Kosovës (IKShPK) nxorën se uji nuk është burimi i helmimit.

Ministri i Shëndetësisë, Arben Vitia, ka thënë të mërkurën se disa mostra të ujit do të dërgohen jashtë vendit për analiza më të thella.