Presidenti i Serbisë, Aleksandër Vuçiq, ka biseduar të martën me përfaqësues të listës zgjedhore “Alternativa Demokratike Shqiptare – Lugina e Bashkuar”.

Këto janë konsultimet e para të Vuçiqit për formimin e qeverisë, pas zgjedhjeve të 21 qershorit.

Në një njoftim të publikuar në uebfaqen e presidentit të Serbisë është thënë se Vuçiqi “i dëgjoi propozimet, kërkesat dhe nevojat” e përfaqësuesve të Luginës së Preshevës, të cilët, për herë të parë në tri dekadat e fundit, kanë marrë pjesë me një listë të përbashkët në zgjedhjet parlamentare të Serbisë.

“Përfaqësuesit e partive shqiptare kanë folur për qëllimin që shqiptarët të integrohen sa më shumë në institucionet e shtetit të Serbisë, si dhe për domosdoshmërinë e përparimit ekonomik, si në jug të Serbisë, ashtu edhe në të gjithë vendin”, është thënë në njoftimin e Presidencës serbe.

Vuçiqi citohet të ketë thënë se është i gatshëm që në mënyra të ndryshme “të ndihmojë zhvillimin e jugut të Serbisë”, raporton “Rel”.

Ai ka thënë se do t’i informojë përfaqësuesit e partive shqiptare në 14 ditët e ardhshme për rrjedhën e mëtejshme të formimit të Qeverisë së Serbisë.

Shaip Kamberi, nga Partia për Veprim Demokratik në Bujanoc, i cili ka marrë pjesë në takim me Vuçiqin, tha se vendimi i përfaqësuesve të Luginës rreth qëndrimit ndaj qeverisë së re, “do të varet nga qëndrimi dhe programi që kjo qeveri do të ketë ndaj shqiptarëve dhe kërkesave të tyre legjitime”.

“Me presidentin e Republikës së Serbisë, Aleksandar Vuçiq, në cilësinë e deputetëve të listës shqiptare, biseduam për nevojat e domosdoshme të popullsisë shqiptare, të cilat me dekada po injorohen”, ka shkruar Kamberi në llogarinë e vet në “Facebook”.

Më 5 korrik, Komisioni Zgjedhor në Serbi ka publikuar rezultatet përfundimtare të zgjedhjeve të 21 qershorit, në bazë të të cilave “Alternativa Demokratike Shqiptare – Lugina e Bashkuar” ka fituar tre mandate për deputetë.

Vuçiqi ka fituar mbi 60 për qind të votave në këto zgjedhje, që janë bojkotuar nga një pjesë e opozitës në Serbi.

Ai do t’i vazhdojë konsultimet me partitë e tjera gjatë kësaj jave.