Një kontingjent prej 54 tonelatash me ndihma ushqimore dhe ushqime për bagëtitë janë dërguar nga Vushtrria në Shqipëri për t’i dalë në ndihmë zonës së Fierit, e cila është prekur më së rëndi nga përmbytjet e fundit.

Apelit të kryetarit të Komunës së Vushtrrisë, Bajram Mulaku, për t’i ndihmuar banorët e Fierit me të cilët kjo komunë është e binjakëzuar, i janë përgjigjur pozitivisht disa nga bizneset vendore: “Ariani”, “Apetiti”, “Edona”, mulliri “Zekolli” në Maxhunaj, “Agro Vin” “Vipa Pestova” “Emona Center”, “Emona City”, salloni i automjeteve “Alberti”, “Molitoria” dhe mulliri i “Meti Supiut”.

Të gjitha këto kompani kanë shprehur gatishmërinë të solidarizohen me vëllezërit nga Fieri për ta përballuar sadopak situatën e krijuar në atë anë.

Ambasadori i Shqipërisë në Kosovë, Qemal Minxhozi, ka vlerësuar lart ndihmën që po ofrojnë institucionet dhe bizneset e Vushtrrisë drejt zonave të prekura nga vërshimet që ndodhën në Shqipëri. Ndërsa kryetari i Vushtrrisë, Bajram Mulaku dhe nënkryetari Dibran Përçuku, kanë monitoruar deri në Shqipëri kontingjentin me ndihma për banorët e zonës së Fierit.