Lëvizja Vetëvendosje ka publikuar sot një video përmes të cilës është munduar të rregullojë imazhin e Qeverisë Kurti duke thënë se tashmë ka ndryshuar puna edhe në shërbimin e jashtëm.

Siç thuhet në videon e publikuar nga Lëvizja Vetëvendosje, tashmë nuk emërohen ambasadorë në bazë të lidhjeve familjare dhe se s’ka më raste të skandaleve me rrahje e trafik narkotikësh.

Megjithatë partia në pushtet në videon propaganduese kanë fshehur një prej skandaleve më të mëdha të diplomacisë kosovare, rastin e ambasadorit Martin Berishaj i cili mbushi faqet e mediave sllovene si i dyshuar për përfshirje në shpëlarje parashë.

Shuma e cila është raportuar në mediat sllovene është 600 mijë euro. Vetë Berishaj i ka mohuar raportimet e tilla, derisa institucionet e Kosovës s’kanë ndërmarrë asnjë hap që do të çonte në shkarkimin nga detyra të ambasadorit deri në sqarimin e situatës.